Ráðherrar njóta sömu réttinda og aðrir opinberir starfsmenn

Ráðherra og alþingismenn njóta í dag sömu lífeyrisréttinda og opinberir starfsmenn.

Guðmundur Ólafsson, hagfræðingur, sagði í fréttum Stöðvar 2 í gær að það væri réttlætismál að allir landsmenn nytu jafnra lífeyrisréttinda. Hann sagði að það væri til skammar að láta ráðherra njóta sérkjara.

ASÍ ætlar að setja jöfnun lífeyrisréttinda á oddinn í komandi kjaraviðræðum. Lífeyrissjóður starfsmanna ríkisins nýtur fullrar ríkisábyrgðar og því búa opinberir starfsmenn ekki við skerðingu á lífeyrisréttindum eftir bankahrunið líkt og gildir um lífeyrisþega á almennum vinnumarkaði.

Hrannar B. Arnarsson, aðstoðarmaður Jóhönnu Sigurðardóttir, vill vegna þessarar umræðu koma því á framfæri að eitt af fyrstu verkum minnihlutastjórnar Jóhönnu Sigurðardóttur hafi verið að afnema sérlög um lífeyri alþingismanna og ráðherra. Réttindi þeirra séu í dag þau sömu og réttindi annarra opinberra starfsmanna. Þetta var gert með afnámi laga frá árinu 2003 um eftirlaun forseta Íslands, ráðherra, alþingismanna og hæstaréttardómara.