Eiginmaðurinn talinn vera burðardýr

Lögreglan á Suðurnesjum handtók karlmann á þrítugsaldri í fyrrakvöld í tengslum við rannsókn á fíkniefnamáli sem upp kom í Leifsstöð á mánudagskvöld. Þá voru hjón á fertugsaldri tekin með tæplega þrjú hundruð grömm af kókaíni við komuna til landsins frá Kaupmannahöfn.

Maðurinn sem handtekinn var í fyrrakvöld er búsettur í Reykjavík og hefur margoft komið við sögu hjá lögreglu, meðal annars vegna fíkniefnamála.

Síðdegis í gær var tekin sú ákvörðun að láta manninn lausan en hann liggur þó áfram undir grun um aðild að málinu.

Hjónin sem handtekin voru á mánudagskvöldið eru einnig búsett í Reykjavík. Þau hafa aldrei komið við sögu hjá lörgeglu áður. Kókaínið fannst við hefðbundna leit tollgæslu í Leifsstöð. Konunni var sleppt eftir yfirheyrslur en maðurinn var úrskurðaður í gæsluvarðhald til 13. desember.

Grunur leikur á að hann hafi verið burðardýr á vegum hins sem handtekinn var í fyrrakvöld, samkvæmt upplýsingum Fréttablaðsins.

Það er lögreglan á Suðurnesjum sem fer með rannsókn málsins, sem hún segir vera á mjög viðkvæmu stigi.- jss