Brenndu sænska jólageit við Ikea

Óprúttnir aðilar kveiktu í fimm metra hárri jólageit sem stóð fyrir utan Ikea í Garðabæ í nótt. Slökkviliðið var kallað á vettvang og réði niðurlögum eldsins án nokkurra vandkvæða. Geitin stóð á lóð Ikea en nærliggjandi mannvirki voru ekki í hættu vegna eldsins.

Samkvæmt upplýsingum frá Ikea tilheyrir strágeitin sænskri jólahefð sem kallast Gävlebocken. Gävle er borið fram sem Jevle og er bær í Svíþjóð.

Samkvæmt upplýsingum frá Ikea þá er það engin nýlunda að geitin sé brennd með svo fólskulegum hætti en alls hefur geitin verið brennd 32 sinnum frá árinu 1966 á Sluttstorginu í Gävle . Þannig hefur geitin verið brennd eða eyðilögð með einhverjum hætti næstum árlega frá því hún var fyrst sett upp í bænum.

Það varð til þess að forsvarsmenn hættu að setja hana upp um tíma. Að lokum var hún endurreist, en þá með strangri öryggisgæslu. Það skipti engu því eitt skiptið þegar verðirnir fóru í kaffi snéru þeir aftur til þess eins og að finna geitina í ljósum logum.

Það var síðast í byrjun desember á þessu ári sem brennuvargar reyndu að kveikja í geitinni. Þeim tókst það þó ekki. Um miðjan desember birtust fréttir á sænskum vefsíðum um að einum öryggisverði hefði verið boðnar mútur til þess að yfirgefa varðstöð sína svo þjófar gætu rænt geitinni með aðstoð þyrlu og flutt hana til Stokkhólms.

Samkvæmt upplýsingum frá lögreglunni á höfuðborgarsvæðinu þá hefur enginn verið handtekinn vegna málsins. Lögreglan tók hinsvegar skýrslu af þremur ungum mönnum sem komu keyrandi á vettvang þegar slökkvistarfi stóð sem hæst um klukkan fjögur í nótt. Þeir eru þó ekkert sérstaklega grunaðir um verknaðinn að sögn varðstjóra lögreglunnar.

Hafi einhver upplýsingar um málið er hinum sama bent á að hafa samband við lögregluna.