Íhugar að stefna þingmanni vegna bloggfærslu

Guðlaugur Þór Þórðarson, þingmaður Sjálfstæðisflokksins, íhugar að höfða meiðyrðamál á hendur þingmanni VG, Birni Vali Gíslasyni, vegna bloggfærslu sem hann birti á mánudaginn.

Í bloggi sínu fer Björn Valur hörðum orðum um Guðlaug og sakar hann meðal annars um mútuþægni. Hann vitnar þar til styrkja sem Guðlaugur fékk í prófkjörum sínum og þóttu meðal annars umdeildir innan Sjálfstæðisflokksins á sínum tíma.

Samkvæmt frétt Fréttatímans, sem birtist í morgun um málið, þá fór bloggfærslan illa í þingmenn Sjálfstæðisflokksins.

Björn vék einnig að Kristjáni Þór Júlíussyni, þingmanni Sjálfstæðisflokksins, á bloggi sínu en baðst afsökunar á þeim ummælum.

Hann hefur ekki beðist afsökunar á ummælum sínum gagnvart Guðlaugi, því íhugar Guðlaugur réttarstöðu sína í ljósi þess að hann er borinn sök um að hafa orðið uppvís af lögbroti.