Jón Gnarr: Sker niður í sátt við sína samvisku

„Þessi fjárhagsáætlun er í sátt við mína samvisku," sagði Jón Gnarr, borgarstjóri Reykjavíkur, í Kastljósinu í kvöld þar sem hann mætti oddvita borgarstjórnarflokks Sjálfstæðisflokksins, Hönnu Birnu Kristjánsdóttur.

Hanna Birna gagnrýndi nýja fjárhagsáætlun meirihluta borgarstjórnar harðlega í Kastljósinu og sagði raunverulegan sparnað ekki nema um 4 prósent og að auki væru 65 prósent af henni kostnaðarauki til nýrra verkefna. Borgin þurfti að skera niður um fimm milljarða.

Jón Gnarr sagði það vissulega rétt að kostnaðaraukar væru í áætluninni. Meðal annars hækkun á lágmarksframfærslu.

Hanna Birna gagnrýndi einnig að meirihlutinn nýtti ekki þá átján milljarða sem borgin á í lausafé. Jón Gnarr benti á að í lok ársins yrðu þessir 18 milljarðar orðnir 11 milljarðar. Þá sagði hann það skyldu borgarinnar að tryggja endurfjármögnun og stöðugleika Orkuveitunnar.

Svo spurði hann Hönnu Brnu hversvegna þeir 14 milljarðar sem borgin átti árið áður hefðu ekki verið nýttir í niðurskurðinum þá, en þetta er þriðja árið í röð sem borgin þarf að skera niður.

Hanna Birna sakaði meirihlutann, og þá helst Besta flokkinn, um að hafa búið til gamaldags fjárhagsáætlun sem hefði sæmt sér vel fyrir hrun. Hún sagðist í það minnsta ekki hafa orðið vör við nýja strauma þar.

Hún sagði Besta flokkinn í raun standa vörð um kerfið, það hefði verið hægt að ganga mun harðar á það frekar en barnafólkið í Reykjavík.

„Fólkið þarna úti Jón, getur þetta ekki," sagði Hanna Birna.

Jón sagði margt koma til. Meðal annars væru einfaldlega ekki miklir peningar fólgnir í því að lækka laun starfsmanna borgarinnar. Spurður hvort borgarbúar ættu að taka skellinn sagði Jón að borgin yrði að afla þessara tekna með einhverjum hætti.

„Ég geri þetta í sátt við mína samvisku," sagði Jón.