Segir Framsókn eiga hugmyndina um uppboðsmarkað á gjaldeyri

Eygló Harðardóttir þingmaður Framsóknarflokksins segir áhugavert að stjórnarliðar hafi loksins séð ljósið varðandi uppboðsmarkað á gjaldeyri, eins og Framsóknarflokkurinn hafi áður lagt til. Flokkurinn hyggst leggja þetta til á ný og vonist til að Alþjóðagjaldeyrissjóðurinn hætti að standa í vegi fyrir að þessi leið verði farin.

Lilja Mósesdóttir, hagfræðingur og þingmaður Vinstri grænna, íhugar að leggja fram þingsályktunartillögu um að farin verði svo kölluð uppboðsleið við afnám gjaldeyrishafta hér á landi.

Í því felst að settur yrði á fót uppboðsmarkaður með gjaldeyri, þar sem innlendir eigendur gjaldeyris geti selt hann á til aðila sem eru tilbúnir að greiða hærra krónuverð fyrir hann en sem nemur skráðu gengi og skattleggja yfirverðið. Þannig sé hægt að tappa hægt og bítandi af óþolinmóðu fjármagni sem vill yfirgefa landið. Eygló Harðardóttir, þingmaður Framsóknarflokksins, segir að þessi hugmynd sé ekki ný af nálinni.

Eygló segir að Framsóknarflokkurinn hafi í febrúar 2009 lagt fram sem þingsályktun á Alþingi um leiðir fyrir Ísland til þess að vinna sig út úr efnahagsvandanum og þar á meðal hafi verið sama hugmynd Lilju um gjaldeyrishöftin.

Eygló segir að Framsóknarflokkurinn hyggist nú leggja fram þessa tillögu aftur næsta haust.