Daðrar við mótleikkonu

Leikarinn Johnny Depp er fallinn kylliflatur fyrir hinni 19 ára gömlu leikkonu, Kristen Steph­enson-Pino. Frá þessu greinir slúðurritið Star og hefur á orði að Depp hafi ekki farið leynt með aðdáun sína á fegurðardísinni. Depp og Stephenson-Pino leika saman í myndinni Pirates of the Caribbean og er þeim vel til vina að sögn blaðsins.

Samband Johnny Depp og franska söngfuglsins Vanessu Paradis hefur, á þeim tólf árum sem þau hafa verið saman, verið laust við slúðursögurnar sem jafnan eru fylgifiskur kvikmyndabransans. Nú er annað komið á daginn en Vanessa Paradis mun aldrei hafa heimsótt sambýlismanninn sinn meðan tökur fóru fram á paradísareyjunni Havaí.