Knattspyrnuþjálfarar biðla til ljósmyndaþjófa

Knattspyrnuþjálfarafélag Íslands óskar eftir vitnum af því þegar myndavélum var stolið úr höfuðstöðvum KSÍ í Laugardal þann 13. nóvember síðastliðinn.

Ljósmyndavörur voru teknar ófrjálsri hendi þar sem þær voru geymdar yfir nótt í einu herbergi inn af veislusal KSÍ. Félagið leitar nú að vörunum og er tilbúið að kaupa þær til baka.

Mesta tjón félagsins er þó ekki stuldurinn á myndavélunum sjálfum, heldur myndirnar sem voru á minniskortunum.

Ljósmyndari félagsins hafði tekið hundruð mynda af vel heppnaðri afmælisveislu Knattspyrnuþjálfarafélagsins sem nú hafa glatast. Í veislunni voru 70 aðilar heiðraðir fyrir störf sín í þágu knattspyrnunnar undanfarin 40 ár.

Þeir sem telja sig hafa séð myndavélarnar eða vita af þeim er vinsamlegast bent á að koma þeim upplýsingum til KÞÍ á einn eða annan hátt.

Þá vill félagið koma þeim skilaboðum áleiðis að ef viðkomandi hefur keypt vörurnar eða hefur þær í sinni vörslu þá er KÞÍ tilbúið að kaupa þær svo lengi sem myndirnar eru ennþá á minniskubbunum.

Hér fyrir neðan má finna lista yfir hlutina sem var stolið.

Canon EOS Rebel myndavél

Linsa 18-55 mm

Linsa 200 mm

Linsa 55-200 mm

3 minniskort

Samsung digital myndavél

Þrífótur

2 batterí

Hleðslutæki

Tölvutengi

Bók um stafræna ljósmyndun

Bæklingur um Canon EOS Rebel

Bakpoki