Gamlir en vinalegir vitleysingar á topplistanum

Fortíðarþráin virðist ríkjandi hjá kaupendum barnaefnis fyrir þessi jólin og sjást þess merki vel á listum yfir mest seldu mynddiskana.

Klaufabárðarnir, vitleysingarnir vinalegu sem urðu góðkunningjar hverrar fjölskyldu fyrir um þrjátíu árum, verma þrjú sæti á lista Eymundsson yfir mest selda barnaefnið í desember.

Þriðji og nýjasti diskurinn er þar í fjórða sæti en fyrir síðustu jól komu út diskar 1 og 2. Þeir eru aftur komnir á topplistann - fyrsti diskurinn í tólfta sæti og diskur númer tvö í því fimmtánda.

Mynddiskur með frönsku teiknimyndunum „Einu sinni var... Saga mannkyns" frá árinu 1978 nýtur einnig mikilla vinsælda um þessar mundir. Því er greinilegt að það er ekki aðeins nýtt barnaefni á borð við Toy Story, Sveppa og Harry Potter sem heillar fyrir þessi jólin.

Hrein nostalgía

„Við finnum að fólki finnst gaman að geta boðið börnunum sínum að horfa á það sama og það horfði á sjálft sem krakkar," segir Eyrún Magnúsdóttir, sem ásamt manni sínum og barnsföður hóf útgáfu á Klaufabárðunum á síðasta ári.

„Margir tala um að þetta sé eins og að hitta gamla vini aftur sem maður hefur ekki séð í mörg ár. Þannig að það má segja að það verði fagnaðarfundir þegar Klaufabárðarnir birtast á skjánum eftir áratuga fjarveru," segir hún.

Hugmyndin að útgáfunni kom þegar Eyrún var ólétt af syni þeirra sem nú er rúmlega tveggja ára gamall.

„Þetta var bara hrein nostalgía," segir Eyrún sem segir þau hafa langað til að leyfa syninum að njóta sama barnaefnis og þau horfðu á sem börn. Viðtökurnar hafa verið mjög góðar og greinilegt að landinn kann vel að meta barnaefni með vísan í fortíðina.

Þættirnir fjalla um tvo nágranna sem virðast hafa sérstakt lag á að koma sér í heimatilbúið klandur af einhverju tagi. Á þriðja disknum má til dæmis fylgjast með þeim flytja þvottavél upp á þriðju hæð á sinn sérstaka hátt, búa sér til líkamsræktartæki úr gardínustöngum og öðrum lausamunum, og mála íbúð á nýstárlegan hátt.

Fluttu síðar í einbýlishús

Klaufabárðarnir tékknesku komu fyrst út 1979 .Á mynddiskunum þremur eru 35 þættir, þar af voru 28 framleiddir á árunum 1979-1985. Síðustu sjö þættirnir á disk 3 skera sig úr, en þeir voru framleiddir rétt eftir Flauelsbyltinguna á árunum 1989-1990. Í þessum „nýju" þáttum eru Klaufabárðarnir fluttir út blokk í einbýli og tæknileg áferð þáttanna er önnur. En glöggir áhorfendur taka líka eftir því að annar þeirra félaga hefur skipt gráu rúllukragapeysunni út fyrir rauða.



Ritskoðun í gömlu Tékkóslóvakíu

Upprunalega áttu Klaufabárðarnir að vera í gulri og rauðri peysu. Þar sem ritskoðun var við lýði í gömlu Tékkóslóvakíu var því breytt þar sem einhverjir töldu víst að með litavalinu væri verið að vísa í samskipti stórveldanna Kína, táknað með gulu, og Rússlands, táknað með rauðu. Á árum Flauelsbyltingarinnar, 1989-1990, og mikilla þjóðfélagsbreytinga í gömlu Tékkóslóvakíu þótti hins vegar við hæfi að draga fram rauðu peysuna og láta alla ritskoðun sem vind um eyru þjóta.