Finna ekki munka sem vilja til Íslands

Kaþólska kirkjan á Íslandi leitar enn að munkum í klaustur hér á landi, að sögn séra Patricks Breen, staðgengils biskups. „Það er samt langt í land ennþá,“ segir séra Patrick og áréttar að ekki sé komið að því að finna munkaklaustrinu stað eða huga að byggingu þess. „Fyrst leitum við að munkum og það mál er ekki enn í höfn.“ Kaþólska kirkjan hér hefur verið í sambandi við nokkur klaustur víða um heim, en án árangurs enn sem komið er. „En við gefumst ekki upp,“ segir séra Patrick.

Hugmyndin um að stofna munkaklaustur á Íslandi segir hann langt því frá nýja af nálinni. „Þessar hugmyndir hafa verið í gangi í áratugi, næstum heila öld,“ segir séra Patrick. Þá hafi þekktir Íslendingar verið fylgjandi hugmyndinni, þeirra fremstir ef til vill Halldór Laxness, sem tók kaþólska trú í klaustri í Lúxemborg og Kristján Eldjárn forseti, sem hann segir hafa látið spyrja páfann í Róm um hvort ekki mætti koma hér á stofn munkaklaustri.

„Allir kaþólskir biskupar sem hér hafa verið, allt frá því Meulenberg varð fyrstur biskup í Landakoti, hafa reynt. Meulenberg fékk munka frá klaustri í Hollandi, keypti jörðina Bjarnarhöfn á Snæfellsnesi og var búinn að skrifa undir,“ segir séra Patrick en þá brast á með seinni heimsstyrjöldinni og snurða hljóp á þráðinn.

Séra Patrick segir fyrirbænir helstu ástæðu þess að kaþólska kirkjan vilji fá munka til Íslands. „Við viljum fá þá til að biðja, biðjast fyrir, biðja fyrir fólki og fyrir öllum bænarefnum sem standa til bæði hjá einstaklingum og fyrir þjóðfélaginu. Og líka um leið til þess að hafa stað þar sem fólk getur komið til að halda kyrrðardaga, til að tala um andleg málefni við munka, til að draga sig í hlé,“ segir hann og kveður þar komna helstu ástæðu þess að kirkjan vilji ekki hafa klaustrið of langt frá borginni. „Til þess að fólk geti farið um helgar og jafnvel á kvöldin í einn til tvo tíma eftir vinnu til að vera viðstatt helgihald í klaustrinu.“

Fyrirmyndir að slíku munkaklaustri segir séra Patrick víða að finna, svo sem í Frakklandi og Þýskalandi. „Slík klaustur hafa geysilega mikið aðdráttarafl.“ Að auki segir séra Patrick að ef klaustrið sé ekki of langt frá borginni þá mætti hafa þar aðstöðu til barna- og unglingastarfs. „Við erum ekki með neitt þannig eins og er, ekki eins og lúterska kirkjan sem getur sent krakka í Vatnaskóg eða á svipaða staði. Við erum ekki með neitt svoleiðis og viljum helst hafa munka til slíkra starfa.“

olikr@frettabladid.is