Vill gjaldtöku á farseðla til að vernda náttúruperlur

Formaður Náttúruverndarsamtaka Íslands segir eðlilegast að leggja hóflegt gjald á flugfarseðla til að fjármagna eftirlit og viðhald með helstu náttúruperlum Íslands, en átroðningur á þær er svo mikill að þær liggja undir skemmdum.

Í nýrri skýrslu Umhverfisstofnunar um átand friðlýstra svæða segir að mörg þeirra líði fyrir stöðugan átroðning ferðmanna og slæma umgengni. Í skýrslunni segir að grípa verði til tafarlausra aðgerða til að hindra meiri skemmdir á níu svæðum. Efst á lista eru Gullfoss og Geysir, Teigarhorn og friðlandið að Fjallabaki. Þá koma Reykjanesfólkvangur, Grábrókargígar og Hveravellir og loks Surtarbrandsgil, Helgustaðanáma og Dyrhólaey.

Umhverfisráðherra lýsti þeirri skoðun í vikunni að skoða mætti sérstök komugjöld til að búa til tekjustofn til að sinna friðlýstum svæðum.

Í leiðara Fréttablaðsins gær segir að lausnin felist í því að taka gjald af þeim ferðamönnum sem skoði vinsælar náttúruperlur og nota tekjurnar til að bæta eftirlit, aðstöðu og þjónustu. Þetta geri allar sæmilega þróaðar þjóðir og ferðamenn skilji að það kosti fjármuni að veita aðgang að friðlýstum svæðum. Ekki sé sanngjarnt að taka komugjald af ferðamönnum sem ætli sér ekki að skoða viðkomandi staði, eins og þeir sem koma hingað aðeins til að kíkja á næturlífið í Reykjavík.

Eðlilegast að setja þetta á flugfarseðilinn

Hvað finnst þér um þessar hugmyndir umhverfisráðherra um hugsanlega láta erlenda ferðamenn greiða komugjöld, er þetta ekki í eðli sínu ósanngjörn leið því menn hafi mismunandi hvata til að sækja þetta land heim? „Það er ekkert alveg sanngjarnt þegar verið er að teygja sig í vasa neytandans og skattgreiðandans en ég held að þetta sé einfaldast og sársaukaminnst fyrir alla aðila og nauðsynlegt,“ segir Árni Finnsson, formaður Náttúruverndarsamtaka Íslands.

Árni segir að nokkuð hundruð króna gjald á farseðlana sé hóflegt og sanngjarnt. „Það kallar á mikla skipulagningu og skrifræði að vera með rukkun fyrir opin svæði, eins og á miðhálendingu, þess vegna er einfaldast að rukka þetta af flugmiðanum hingað eða ferjugjaldinu,“ segir Árni.