Dómur kveðinn í prófmáli um vexti gengistryggðra lána

Dómur verður kveðinn upp í prófmáli um vexti gengistryggðra lána á föstudag. Stjórnvöld munu ekki grípa til lagabreytinga fyrr en í fyrsta lagi þegar dómur Hæstaréttar liggur fyrir. Það verður í fyrsta lagi í haust.

Málið höfðaði fjármögnunarfyrirtækið Lýsing á hendur skuldara í vanskilum. Ágreiningur er um hversu háar eftirstöðvar lánsins eru, sem skuldarinn þarf að greiða, en það veltur á þeim vöxtum sem reiknaðir verða á lánið. Algjör óvissa hefur ríkt um uppgjörsvexti gengistryggðra lána eftir að Hæstiréttur dæmdi gengistryggingu ólöglega.

Miklu munar á eftirstöðvunum eftir því hvaða vextir verða dæmdir á lánið. Ítrustu kröfur Lýsingar hljóða upp á bæði verðtryggingu og vexti samkvæmt gjaldskrá fyrirtækisins, en alls setur fyrirtækið fram fimm varakröfur, þar á meðal að samningsvextir standi. Ef samningsvextirnir standa verða eftirstöðvar lánsins aðeins rúmar 120 þúsund krónur. Ef fallist verður á ítrustu kröfur verða þær meira en tífalt hærri, eða rúmar 1,3 milljónir.

Málið var flutt fyrir héraðsdómi Reykjavíkur þann 7. júlí síðastliðinn. Dómsuppsaga í málinu er komin á dagskrá héraðsdóms, en dómur verður kveðinn upp klukkan hálftólf á föstudag. Næsta öruggt má telja að málið fari fyrir Hæstarétt. Í Fréttablaðinu í dag er greint frá því að stjórnvöld bíði úrskurðar í málinu og muni líta til niðurstöðu héraðsdóms varðandi breytingar á lögum í kjölfar dóms Hæstaréttar. Ekki sé unnið að lagabreytingum í ráðuneytunum, en dómurinn gæti breytt því.