Framsóknarmenn verjast ásökunum

Það er rangt að breytingar á útlánareglum Íbúðalánasjóðs árið 2004 hafi ráðið úrslitum um þenslu í hagkerfinu. Bankarnir bera þar höfuðábyrgð.

Þetta segja þrír fyrrum ráðherrar Framsóknarflokksins - hver í sínu lagi - í bréfum til þingmannanefndarinnar sem fjallaði um skýrslu rannsóknarnefndar Alþingis.

Í skýrslunni segir að breytingarnar, sem gerðar voru í framhaldi af kosningaloforði framsóknarmanna 2003, hafi verið þensluhvetjandi og með stærri hagstjórnarmistökum.

Jón Sigurðsson, Jónína Bjartmarz og Valgerður Sverrisdóttir mótmæla þessu. Valgerður segir að þegar lögum um sjóðinn hafi verið breytt hafi bankarnir þegar lánað um 180 milljarða króna í nýjum fasteignalánum. Bætir hún við að innkoma bankanna á markaðinn hafi fyrst og fremst haft þann tilgang að „reyna að gera út af við Íbúðalánasjóð".

Jónína bendir á að á átján mánaða tímabili hafi bankarnir veitt rúma 300 milljarða til íbúðalána. Þau hafi ekki verið einskorðuð við kaup eða byggingu íbúðahúsnæðis heldur „fóru að stórum hluta í neyslu og aðrar fjárfestingar".

„Viðskiptabankarnir réðu algerlega úrslitum um framvindu mála á íbúðalánamarkaði," segir Jón.- bþs