Tilkynnt um eld í báti við Látraröst

Vörður, björgunarskip Slysavarnafélagsins Landsbjargar á Patreksfirði, var kallað út rétt eftir klukkan þrjú í dag þegar tilkynnt var í eld í báti við Látraröst. Tveir skipsverjar eru um borð í bátnum sem er yfirbyggður plastbátur og hafa þeir náð að slökkva eldinn, að því er fram kemur í tilkynningu frá Landsbjörg.

Björgunarskipið er nú á leið á staðinn og einnig hefur björgunarsveitin Bræðrabandi á Rauðasandi verið sett í viðbragðsstöðu. Sem stendur gengur báturinn fyrir eigin vélarafli og er verið að sigla honum til Patreksfjarðar. Að sögn skipsstjóra er vestan kaldi á svæðinu.

Búist er við að björgunarskipið verði komið að bátunum eftir tæpa klukkustund.