Dældu bensíni á dísel-jeppa á Eskifirði

„Það var nú ekki ég, það var ferðafélagi minn," segir Bjarni Benediktsson, formaður Sjálfstæðisflokksins. Vísir fékk ábendingu um að Bjarni hafi dælt bensíni á dísel-bíl fyrir austan nú á dögunum. Hann segir það rangt, hann hafi einungis verið farþegi í bílnum en hann er á ferðalagi fyrir austan með vini sínum.

„Þetta var ekkert merkilegt, þetta var alveg skaðlaust. Hann var bara að fylla á bílinn, þetta var það lítið að það þurfti ekki að tæma tankinn," segir Bjarni og tekur fram að ekkert tjón hafi hlotist af bensíninu. Atvikið atti sér stað á N1 á Eskifirði samkvæmt heimildum Vísis.

Bjarni vildi ekki gera mikið úr atvikinu í samtali við Vísi. „Þetta var ekki minn bíll, þetta var ekki ég. Ég var bara farþegi í þessum bíl," segir Bjarni.