Grunur um salmonellu

Komið hefur upp grunur um salmonella smit í ferskum kjúklingi framleiddum af Matfugli ehf. Frekari rannsókna er þörf til þess að staðfesta gruninn en þangað til telur fyrirtækið rétt að innkalla vöruna. Um er að ræða kjúkling með rekjanleikanúmerum (Rlnr.) 011-10-43-2-25. Dreifing á vörunni hefur verið stöðvuð. Í samræmi við innra eftirlit fyrirtækisins og í samráði við heilbrigðisyfirvöld hefur verið unnið að innköllun vörunar, að því er fram kemur í tilkynningu.

Skammt er síðan upp kom smit í kjúlingum frá Matfugli og Reykjagarði og voru vörur innkallaðar úr verslunum í kjölfarið. Síendurtekið salmonellusmit hjá kjúklingaframleiðendum hefur leitt til viðvarandi skorts á kjúklingi í verslunum.

Í tilkynningu Matfugls í dag segir að hafi fólk ferska kjúklinga heima hjá sér er það beðið um að gæta að rekjanleikanúmerinu, sem er að finna á umbúðunum, og skila kjúklingnum í viðkomandi verslun eða beint til Matfugls, Völuteigi 2 í Mosfellsbæ.