Orðspor fjórflokksins lélegt

„Íslendingar hafa sýnt aðgerðarleysi ríkisstjórnar Samfylkingar og VG gríðarlegt langlundargeð. Það orsakast af því hvað hinir hlutar fjórflokksins hafa lélegt orðspor," segir í ályktun sem miðstjórn Frjálslynda flokksins samþykkti og sendi frá sér í dag. Flokkurinn þurrkaðist út af þingi í kosningunum í apríl á síðasta ári.

Miðstjórnin segir ríkisstjórnina storka almenningi með marklausu tali þar sem slegið sé úr og í hvernig marglofuð skjaldborg verði reist um íslensk heimili. „Engar aðgerðir liggja fyrir og ekki einu sinni útreikningar á mögulegum lausnum nú tveimur árum eftir hrun!"

Miðstjórn Frjálslynda flokksins telur jafnframt að stjórnvöld bjóði ekki upp á útfærða atvinnustefnu.

„Ríkisstjórnin hefur í orði kveðnu ráðfært sig við hin ýmsu öfl í samfélaginu m.a. stjórnarandstöðuflokkana sem sumir hafa tekið þeirri málaleitan illa. Frjálslyndi flokkurinn lýsir sig reiðubúinn til þess að fylla þeirra skarð og benda á velrökstuddar tillögur landi og þjóð til heilla."