Síbrotamaður sló mann í höfuðið með skiptilykli

Karlmaður sem hlaut þriggja ára fangelsisdóm fyrir helgi verður gert að sæta gæsluvarðhaldi meðan á áfrýjunarfresti stendur í máli hans til 24. júní. Maðurinn hefur nær samfelldan brotaferil frá árinu 2005 og því taldi Héraðsdómur Reykjavíkur að hann myndi halda áfram afbrotum yrði hann látinn laus meðan á áfrýjunarfresti stæði yfir. Hæstiréttur staðfesti þann úrskurð í dag.

Maðurinn var síðastliðinn fimmtudag dæmdur í þriggja ára fangelsi fyrir sérstaklega hættulega líkamsárás, umboðssvik og fjársvik. Hann hlaut meðal annars dóm fyrir að hafa ráðist á mann í byrjun mars á þessu ári þegar hann lamdi manninn nokkrum sinnum í höfuðið með skiptilykli með þeim afleiðingum að maðurinn hafi hlotið þriggja sentímetra langan skurð á enni og tvo sjö sentímetra langa skurði á hvirfli.