Segir forráðamenn Sólheima á hálum ís

„Þetta er ótrúleg framkoma við fólk - við skjólstæðinga," skrifar Ólína Þorvarðardóttir, þingmaður Samfylkingarinnar, á bloggsvæði sitt á Eyjunni.

Þar gagnrýnir hún forráðamenn Sólheima í Grímsnesi harðlega og segir þá á hálum ís en þeir héldu blaðamannafund í dag þar sem þeir tilkynntu að þjónustu við fatlaða yrði hætt vegna þess að félagsmálaráðuneytið hefði tilkynnt að fjárveitingar til Sólheima féllu niður um áramótin.

Ólína skrifar á bloggið sitt:

„Málið snýst um flutning málefna fatlaðra frá ríki til sveitarfélaga. Gert er ráð fyrir sama fjármagni til heimilisins og verið hefur undanfarin ár. Sú „alvarlega staða" sem forsvarsmenn Sólheima tala um í fréttum er stormur í vatnsglasi - og sé hún jafn alvarleg og þeir vilja meina, þá er lágmark að málið sé rætt á vitrænum forsendum hjá þeim sem hafa raunverulega um framtíð heimilisins að segja. En að beita fyrir sig varnarlausu fólki og misnota tilfinningalíf þess með þeim hætti sem hér er gert, það er ekki boðleg aðferð."

Þá sakar Ólina forráðmenn um að skapa óöryggi og ótta hjá heimilismönnum Sólheima.

„Vistfólk á Sólheimum á það síst skilið að vera notað með þessum hætti í deilu forsvarsmanna heimilisins við stjórnvöld," skrifar hún svo.

Hún vandar forráðamönnum ekki kveðjurnar í lokin og skrifar:

„Sólheimar í Grímsnesi voru stofnaðir með göfugt markmið á sínum tíma. Það væri óskandi að menn einbeittu sér nú að hinum háleitari markmiðum starfseminnar."

Pistilinn má lesa hér í heild.