Segir Karl hafa þrýst á Ólaf að segja af sér

Fyrrverandi biskupsritari segist hafa lagt að Ólafi Skúlasyni að segja af sér embætti. Það hafi núverandi biskup einnig gert. Ólafur hafi hinsvegar tekið illa í þær hugmyndir því hann hafi litið svo á að með því hafi hann verið að viðurkenna þær ásakanir sem á hann voru bornar. Hann segist í engum vafa um að ásakanirnar hafi alla tíð verið réttar.

Baldur Kristjánsson prestur og fyrrum biskupsritari segist á bloggsíðu sinni hafa átt fund með Ólafi ásamt Karli Sigurbjörnssyni og Guðmundi Þorsteinsyni, þar sem þeir hafi lagt til að Ólafur myndi segja af sér embætti. Það hafi verið mönnum erfitt, enda hafi Ólafur verið kotroskinn og óskorðaður foringi jafnaldra sinna í prestastétt.

Þetta hafi verið gert án tillits til þess hvað hafi verið hæft í ásökunum kvenna um kynferðisbrot en kirkjan hafi þurfti endurnýjun á þessum tíma. Ólafur tók hinsvegar ekki vel í tillöguna.

„Ólafur var ákaflega ákaflega kotroskinn maður og það var mjög erfitt fyrir fólk að koma til hans með svona uppástungur. Það þýddi ábyggilega í huga hans að hann væri játast einhverjum ásökunum," segir Baldur.

Hann segir fundinn ekki hafa verið auðveldan. „Það er aldrei auðvelt fyrir presta eða starfsmenn biskups að vera á fundi með honum og biðja hann um að segja af sér. Þetta lítur mjög einfaldlega út eftir á en í hringiðjunni sjálfri þá er þetta miklu flóknara."

Baldur segir þá þöggun sem ríkti á þessum tíma hafa átt rætur sínar í vina- og kunningjahóp Ólafs. Hann hafi átt vini meðal stjórnmálamanna og annarra áhrifamanna. Andrúmsloftið hafi verið í þá átt að þetta væri tómt rugl, vitleysa og ráðabrugg og það hafi mótað stemmninguna sem ríkti.

En Baldur er í engum vafa um að ásakanirnar hafi verið réttar. „Ég hef aldrei ekki trúað þeim en ég var auðvitað í hópi þeirra sem lengi framan af reyndu að telja sér trú um að þetta væri eitthvað málum blandið. Það hverfur alveg í seinni tíð þegar Guðrún Ebba kemur fram og Birgir Áss. Mín skoðun er sú að þessar ásakanir hafi í alla tíð verið réttar."