Guðrún Jónsdóttir: Vonsvikin yfir getuleysi kirkjunnar

Til að standa undir nafni sem sálgæslustofnun þarf þjóðkirkjan að lýsa því yfir á óvéfengjanlegan hátt að hún muni standa sig í kynfeðisafbrotamálum og hafi þar engin undanbrögð.

Þetta er meðal þess sem Guðrún Jónsdóttir, fyrrverandi forstöðukona Stígamóta, sagði í viðtali í Kastljósi í kvöld en þar voru einnig sýnd gömul viðtöl við Ólaf Skúlason biskup þegar hann var fyrst ásakaður um kynferðisofbeldi.

Tvær konur leituðu til Stígamóta árið 1996 og báru Ólaf þungum ásökunum um kynferðisofbeldi hann átti að hafa beitt þær áratugi áður. Guðrún sagði í viðtal í Kastljóstinu í kvöld að hún hafi trúað þessum ásökunum.

Hún segir það hafa verið lokaúrræði þessara kvenna að leita til Stígamóta.

„Það að þær leituðu til okkar var síðasta úrræðið til þess að fá stuðning og áheyrn," segir Guðrún sem er vonsvikin yfir þeim skorti þjóðkirkjunnar til þess að beina málum af þessum toga í eðlilegan farveg.

Hún benti meðal annars á að prestar væru alveg jafn líklegir og aðrir í veröldinni til þess að beita kynferðisofbeldi. Það væri staðreynd sem ekki væri hægt að víkja sér undan.

Hún gagnrýnir einnig núverandi biskup, Karl Sigurbjörnsson, vegna ummæla hans um að eina réttlætið sem nái nú yfir Ólaf sé æðra máttarvald. Guðrún spurði þá á móti hversvegna menn hefðu þá dómstóla.

Spurð um hugmyndina um nokkurskonar sannleiksnefnd sem myndi rannsaka málið, sagði Guðrún að hún hefði takmarkaða trú á því að slík nefnd gæti leitt allan sannleik í ljós.

Hún vonaði það þó sannarlega.

Aðspurð um mögulega lausn á málinu þá sagði hún að það væri stórt skref ef biskup stígi fram og segði afstöðu sína til kynferðisafbrotamálsins.