Skar á 62 heyrúllur

Óprúttinn aðili tók sig til og skar á 62 heyrúllur við bæinn Vatnsleysu í Biskupstungum, annað hvort á síðasta fimmtudagskvöld eða aðfararnótt föstudagsins. Lögreglan á Selfossi segir það vera ljóst að þarna sé um að ræða tjón sem talið er í hundruðum þúsunda en umtalsverður kostnaður felst í því að pakka rúllunum upp og óvíst er hversu mikið tjón verður á heyinu við það að súrefni kemst að því.

Eins og fram kemur í dagbók lögreglunnar á Selfossi eru fjölmörg mál til rannsóknar hjá embættinu. Lögregla óskar eftir upplýsingum sem leitt geta til þess að þetta mál upplýsist. Þeir sem telja sig hafa vitneskju um málið geta haft samband í síma 480 1010. Alltaf er mikið um það að lögreglu berast slíkar upplýsingar og er þess jafnan gætt að upplýsingagjafinn njóti nafnleyndar.