Máttu greina frá aksturstíma og ökuleið í rannsóknarskýrslu

Íslenska ríkið var sýknað af skaðabótakröfu karlmanns í Héraðsdómi Reykjavíkur í dag.

Maðurinn taldi rannsóknanefnd umferðarslysa meðal annars hafa brotið á friðhelgi einkalífs síns þegar stofnunin birti á vef sínum skýrslu um umferðaslys sem átti sér stað árið 2008.

Krafðist hann fimm milljóna í skaðabætur en hann taldi ekki réttlætanlegt að rannsóknanefndin hefði greint frá akstursleið og ökutíma mannsins sem lenti í slysinu.

Um banaslys var að ræða en karlmaður lést er hann ók út af vegi. Annar karlmaður var með manninum í bílnum. Maðurinn sem kærði hafði verið giftur ökumanninum í átta og hálfan mánuð. Áður höfðu þeir lengi verið í sambúð.

Taldi maðurinn sem stefndi ríkinu að í skýrslu rannsóknanefndarinnar hefðu komið fram upplýsingar sem gátu sýnt fram á að hinn látni hefði átt í ástarsambandi við farþegann. Taldi hann ennfremur að þær upplýsingar hefðu ekki átt erindi við almenning.

Umræddur farþegi gaf ekki skýrslu fyrir dómi en í greinargerð stefnda var því mótmælt að það lægi fyrir að hinn látni og farþeginn hefðu átt í ástarsambandi. Dómara þótti því óvarlegt að telja fullsannað að sambandi hins látna og farþegans hafi verið með þeim hætti sem stefnandi hélt fram.

Í ljósi atvika taldi dómurinn þó rétt að leggja til grundvallar að líkindi væru á því að tengsl mannanna hafi rist dýpra en venjuleg vinatengsl gera að jafnaði.

Héraðsdómur telur það réttlætanlegt að rannsóknarnefndin hafi greint frá akstursleið og ökutíma svo og að farþegi hafi verið í bifreiðinni á leið til Reykjavíkur til að útskýra hvernig nefndin hafi komist að niðurstöðu.

Svo segir í dómnum að það hafi ekki verið ráðið af lestri skýrslunnar um hverja var að ræða eða hvers eðlis samband farþegans og ökumannsins hefði verið. Þá lá ekkert fyrir um að rannsóknanefnd umferðarslysa eða starfsmenn hennar hafi vitað eða mátt vita um kynhneigð mannanna.

Var ríkið því sýknað.