Kate Winslet stofnar samtök fyrir Sólskinsdrenginn

„Þetta eru algjörlega samtökin hennar Kate Winslet, hún er frumkvöðullinn í þessu verkefni," segir Margrét Dagmar Ericsdóttir, móðir Kela, einhverfa stráksins úr heimildarmyndinni Sólskinsdrengurinn.

Breska Óskarsverðlaunaleikkonan Kate Winslet í samstarfi við Margréti Dagmar hefur stofnað alþjóðlegu góðgerðasamtökin The Golden Hat Foundation, eða Gullna hattinn, sem eiga að styðja við og styrkja einhverf börn og foreldra þeirra. Verkefnið var kynnt í Bandaríkjunum í gær og var send út fréttatilkynning til allra stærstu fréttaveitna í heimi samtímis.

Samtökin eru nefnd eftir ljóði Sólskinsdrengsins Kela en auðjöfurinn Richard Branson kemur einnig að samtökunum því hann hyggst lána Margréti sína færustu ráðgjafa til að skipuleggja starfsemina í þaula.

Margrét var nánast orðlaus yfir áhuga og krafti Winslet þegar Fréttablaðið náði tali af henni í Austin í Texas þar sem hún býr um þessar mundir.

„Við hittumst fyrst þegar hún talaði inn á ensku útgáfuna af myndinni í ágúst 2009. Ég ætlaði ekkert að mæta í þær upptökur en umboðsmaður Kate bað mig sérstaklega um að koma. Við náðum strax mjög vel saman og hún gaf mér tölvupóstinn sinn, bað mig endilega um að vera í sambandi," útskýrir Margrét og bætir því við að hún væri eflaust ekki komin á þennan stað ef ekki hefði verið fyrir þátt forsetafrúarinnar Dorritar Moussaeiff sem eigi mikinn heiður skilinn.

Það varð síðan allt brjálað að gera hjá Margréti sem fyrir rælni sendi bara tölvupóstinn sinn til Kate með kærum þökkum fyrir hennar framlag til myndarinnar. „Hún sendi mér tölvupóst á móti og þakkaði mér fyrir að opna fyrir sér heim einhverfunnar."

Margrét segir að hún hafi alltaf haft það að leiðarljósi að stofna alþjóðleg góðgerðasamtök fyrir einhverf börn. Myndin átti bara að vera byrjunin. „En þegar ég og maðurinn minn flugum á kvikmyndahátíðina í Toronto 11. september í fyrra þá var ég eiginlega búin að gefast upp á því. Þegar ég lenti átti ég tölvupóst frá Kate sem spurði hvort hún gæti ekki gert eitthvað fyrir mig, stofnað samtök eða eitthvað þannig."

Og eftir það fór boltinn að rúlla. Heimasíða samtakanna fór í loftið í gær og Margrét trúir varla sínum eigin augum, að hún skuli vera komin á þennan stað eftir frumsýningu myndarinnar í Smárabíói fyrir tveimur árum. „Friðrik Þór leikstjóri sagði reyndar við mig að það væru einhverjir töfrar í kringum þessa mynd. Hann hefur kannski haft eitthvað til síns máls."

freyrgigja@frettabladid.is