Steingrímur J: Ranghugmyndir hafa litað skattaumræðuna

Steingrímur J. Sigfússon fjármálaráðherra segir ranghugmyndir hafi litað umræðu um skatta á síðustu misserum. Að hans mati setja ranghugmyndirnar nokkuð mark sitt á tilllögur forsvarsmanna Samtaka atvinnulífsins og Viðskiptaráðs Íslands í skattamálum.

„Fyrsta atriðið af þessum toga sem ég vil minnast á hefur ítrekað verið haldið fram, meðal annars, af forystumönnum þessara samtaka í ræðu og riti.. Í ræðum og skrifum þeirra sem kalla sig talsmenn atvinnulífsins hafa verið útmálaðar gífurlegar skattahækkanir sem núverandi ríkisstjórn hefur staðið fyrir og sú mikla skattpíning sem hún hefur komið á.

Þetta kom fram í máli Steingríms á opnum fundi SA og VÍ um skatta sem haldinn var í morgun.

Steingrímur sagði að því hafi verið haldið blákalt fram, þvert á allar staðreyndir, að litlar breytingar hafi orðið í ríkisfjármálum og það litla sem áunnist hafi sé allt gert með skattahækkunum.

„Og ýmsir óþroskaðir stjórnmálamenn hafa tekið undir sönginn. En hvað er hæft í þessu? Í stuttu máli ekki neitt," sagði Steingrímur.

Hann bendir á að þegar sitjandi ríkisstjórn tók við stjórnartaumum og greip til ráðstafana í ríkisfjármálum stefndi allt í að halli ríkisstjóðs yrði um 9 prósent af vergri landsframleiðslu.

„Hver er staðan nú hálfu öðru ári síðar? Hallinn á frumjöfnuði ríkissjóðs er áætlaður verða um 2,2% af VLF, þ.e. hann hefur lagast um 6,8% af VLF. Og hvernig skyldi það hafa gerst. Jú, skattar hafa vissulega hækkað og tekjur ríkissjóðs hafa aukist um sem svara 2,3% af VLF. Á sama tíma hafa frumgjöld ríkissjóðs lækkað um 4,5%. Þannig hefur lækkun útgjalda borið uppi aðhaldsaðgerðirnar og verið 2/3 hlutar þeirra en tekjubreytingar þriðjungur. Gangi áform ríkisstjórnarinnar vegna 2011 eftir að meðtöldum þeim hóflegu skattabreytingum sem í undirbúningi eru verður aðlögunin orðin nálægt 9,5% af VLF og um 78% hennar náð með gjaldalækkunum en 22% með tekjubreytingum," segir Steingrímur.