Sakar Gunnar um lýðskrum

Fjárhagsáætlun Gunnars Birgissonar einkennist af lýðskrumi og er að mörgu leyti óraunhæf, segir formaður bæjarráðs í Kópavogi. Ekki verði komist í gegnum 800 milljóna króna hagræðingu án þess að hækka gjaldskrár.

Gunnar Birgisson bæjarfulltrúi og fyrrverandi bæjarstjóri Kópavogs segir að fjárhagsáælun meirihlutans sé árás á ungar barnafjölskyldur og íþróttafélög bæjarins. Hann vill ganga mun skemur í skattahækkunum og hefur lagt fram sína eigin fjárhagsáætlun.

Guðríður Arnardóttir, formaður bæjarráðs í Kópavogi gefur lítið fyrir hugmyndir Gunnars. „Mér finnst það nú einkennast mest megnis af popúlisma þessi áætlun sem hann er að setja fram. Margt í þessu hjá honum er frekar óraunhæft. Hann er með flatar niðurskurðartillögur á flesta liði. Og það sem hann er að leggja til núna það höfum við skorið af fyrir ári síðan. Það er ekki eftir miklu að slægjast í grunnskólunum. Þannig að við höfum reynt að setja þetta þannig upp að fara í frekari strúktúrbreytingar og skipulagsbreytingar heldur en að ráðast í þennan flata niðurskurð," segir Guðríður.

Kópavogur er mjög skuldsett bæjarfélag en meirihlutinn stefnir að því að lækka skuldir um 1 milljarð á næsta ári. Guðríður segir brýnt að setja fram raunhæfa áætlun sem miði að því.

Fjárhagsáætlunin er lögð fram af ellefu bæjarfulltrúum og unnin í nánu samstarfi við starfsfólk bæjarins, að sögn Guðríðar. „Hún er raunhæf og við miðum hana við þær aðstæður sem við erum að takast á við. Það er ekki hægt að komast í gegnum 800 milljóna króna hagræðingu án þess að hækka gjaldskrár," segir Guðríður Arnardóttir, formaður bæjarráðs Kópavogs.