Þessir dæma í Skotlandi um helgina - dómaraverkfallið rifjað upp

Það verða dómarar frá Lúxemborg, Ísrael og Möltu sem munu dæma leikina sex í skosku úrvalsdeildinni um helgina.

Ástæðan er sú að skoskir dómarar verða í verkfalli um helgina, til að mótmæla þeirri gagnrýni sem þeir hafa fengið frá leikmönnum og starfsmönnum liða í haust. Stuðningsmenn hafa einnig látið til sín taka og sumir dómarar hafa fengið líflátshótanir frá þeim.

Mál þetta hefur vakið mikla athygli síðan það fyrst kom upp á mánudaginn. Vísir greindi frá því þá.

Á þriðjudagsmorgun bárust svo fregnir af því að skoska knattspyrnusambandið hefði leitað til knattspyrnusambanda í nágrannalöndunum og á Norðurlöndunum til að fá dómara lánaða til að fylla í skarð skosku dómaranna.

Í fyrstu virtist sem svo að íslenskir dómarar myndu taka það að sér. En því var fljótlega neitað og sendi Félag deildardómara frá sér yfirlýsingu um málið. Þeir myndu standa með sínum starfsbræðrum í Skotlandi sem þverneituðu að hætta við verkfallið.

Dómarar í Bretlandi, Írlandi og á Norðurlöndunum tóku allir í svipaðan streng. Því var næst snúið sér að öðrum Evrópulöndum með þeim árangri að leikirnir geta farið fram um helgina.

Til stóð að dómarar frá Póllandi og Portúgal myndu koma til Skotlands. En í gær var greint frá því að pólska sambandið hafi hætt við og meinað sínum dómurum að fara.

Einn dómari frá Portúgal var kominn til Skotlands í gærkvöldi þegar hann ákvað skyndilega að hætta við og er hann farinn aftur til síns heima.

Það skipti þó ekki máli þegar uppi var staðið því að fresta þurfti leik í bikarkeppninni sem átti að fara fram í dag. Það snjóaði í Skotlandi í nótt og var því ekki hægt að spila á vellinum þar sem leikurinn átti að fara fram.

Dómari bikarleiksins, frá Möltu, var því settur á leik Hibernian og St. Johnstone sem portúgalski dómarinn átti upphaflega að dæma.

Ekki tókst þó að manna alla leiki helgarinnar í Skotlandi og þurfti að til að mynda að fresta leikjum í skosku B-deildinni og bikarkeppninni vegna dómaraverkfallsins.

Þessir dæma leiki helgarinnar í skosku úrvalsdeildinni:

Laugardagur:

Celtic - Inverness: Alain Hamer, Lúxemborg.

Hamilton - St. Mirren: Meir Levy, Ísrael.

Hibernian - St. Johnstone: Christian Lautier, Möltu.

Kilmarnock - Aberdeen: Eli Hacmon, Ísrael.

Sunnudagur:

Dundee United - Rangers: Alain Hamer, Lúxemborg.

Motherwell - Hearts: Meir Levy, Ísrael.