Pólverjar hættu við að senda dómara til Skotlands

Til stóð að dómarar víða úr Evrópu, til að mynda Póllandi, myndu dæma leikina í skosku úrvalsdeildinni um helgina. Nú hefur hins vegar knattspyrnusamband Póllands sett þeim stólinn fyrir dyrnar.

Skoskir dómarar ætla að fara í verkfall um helgina til að mótmæla þeirri gagnrýni sem þeir hafa mátt þola frá leikmönnum og starfsmönnum liða á leiktíðinni. Þá hafa þeir fengið það óþvegið frá stuðningsmönnum og sumir fengið líflátshótanir.

Meðal annars var leitað til Íslands til að fá dómara til að dæma um helgina en Félag deildardómara á Íslandi ákvað að standa með starfsbræðrum sínum í baráttunni.

Í gær staðfesti skoska knattspyrnusambandið að leikir helgarinnar í skosku úrvalsdeildinni myndu fara fram. Þeir eru sex talsins. Eftir því sem fram kemur í fjölmiðlum í Skotlandi í dag höfðu forráðamenn skoska sambandsins samband við nánast öll knattspyrnusambönd Evrópulandanna og munu hafa fengið jákvæð viðbrögð frá Portúgal, Möltu og Ísrael.

Það er hins vegar útlit fyrir að þeir þurfi að endurskipuleggja sig nú vegna pólsku dómaranna sem geta ekki komið. „Við munum ekki senda dómarana okkar til Skotlands á morgun því þeirra er þörf hér heima," sagði í yfirlýsingu frá pólska knattspyrnusambandinu í dag.

Verkfallsaðgerðir skosku dómaranna eru umdeildar en sjálfir telja þeir að með þessu geti þeir bætt knattspyrnuna í Skotlandi.

„Við höfum gefið fólki tækifæri til þess að segja að fólk ætti að koma öðruvísi fram við dómara," sagði John McKendrick, einn dómaranna. „Við viljum að þessi helgi verði notuð til að íhuga hvernig knattspyrnu við viljum hafa í þessu landi og halda áfram út frá því."

Hann var ánægður með stuðning þeirra dómara, eins og þeirra frá Íslandi, sem vildu ekki dæma í Skotlandi um helgina. „Þessi stuðningur sem okkur hefur borist víða að hefur komið okkur gríðarlega mikið á óvart."