G-bletturinn er til

Niðurstaða rannsóknar vísindamanna í King's College í London á hinum dularfulla G-bletti hefur vakið mikla athygli. Ekki eru allir á eitt sáttir við hana.

Um 1.800 konur, allt tvíburar, á aldrinum 23 til 83 ára tóku þátt í könnuninni. Eineggja tvíburar deila sama genamynstri og því töldu vísindamenn að ef annar tvíburanna teldi sig vera með G-blettinn að þá mundi systir hennar gefa sama svar, en sú var ekki raunin og þótti það sýna fram á að bletturinn væri einungis huglægur.

Sigríður Dögg Arnardóttir kynlífsfræðingur telur rannsóknina varhugaverða. „Svona rannsóknir koma reglulega upp. Konur hafa lengi greint frá slíkum bletti sjálfar og lýst sáðláti en þar sem læknasamfélagið fann ekki umræddan blett þá var hugmyndin afskrifuð og mér sýnist þetta vera svipað dæmi. Það er kjánalegt af þeim sem leiða rannsóknina að koma fram og segja G-blettinn hugarburð kvenna bara af því að þeir hafa ekki fundið hann. Aðrar rannsóknir hafa sýnt fram á að það eru einfaldlega ekki allar konur með G-blett og mér finnst það mun líklegra. En ég hvet þær konur sem telja sig hafa fundið blettinn til að halda áfram að örva hann og hafa gaman af."

Jóna Ingibjörg Jónsdóttir, hjúkrunar- og kynfræðingur, tekur undir orð Sigríðar Daggar og segir þessa „ekki-frétt" undirstrika hvað almenningur og fjölmiðlar virðast kokgleypa það sem vísindamenn segja, eða segja ekki.

„Eftir að hafa skoðað það sem hægt er að finna um þessa rannsókn get ég strax sagt að rannsóknin hvorki sannar né afsannar tilvist G-blettsins. Ég tel að þessi blessaði blettur eða svæði sé enn til, auðvitað hefur hann ekki gufað upp. G-blettinum hafa hins vegar verið eignaðir ýmsir eiginleikar í tímans rás sem ekki standast og það er það sem vísindamennirnir við King's College eru í rauninni að segja. Til dæmis hefur honum verið eignaður sá eiginleiki að vera óvenjunæmt taugabúnt inni í leggöngunum og að allar konur ættu að finna það. Það er ekki svo. Hjá sumum konum eykur örvun á þetta svæði kynferðislega nautn, aðrar merkja engin áhrif og enn öðrum finnst örvun á G-blettinn beinlínis vond eða óþægileg. En ég get ekki tekið undir það að G-bletturinn sé eitthvað sem konur hafa verið að ímynda sér," segir Jóna Ingibjörg. Hún segir rannsóknina einfaldlega staðfesta það að kynsvörun kvenna er margbreytileg og það sé af hinu góða. - sm