Mílu gert að veita Vodafone aðgang

Upplýsingatækni Vodafone fær aðgang að ljósleiðara NATO sem er í umsjá og að hluta í eigu Mílu, samkvæmt nýrri ákvörðun Póst- og fjarskiptastofnunarinnar (PFS). Tengingu á helstu staði á að vera lokið fyrir 15. desember, að því er fram kemur í ákvörðuninni. Eftir útboð samdi Vodafone í byrjun þessa árs við Varnarmálastofnun um leigu á ljósleiðara í kapli NATO. Míla á fimm ljósleiðarastrengi í kaplinum, en þrír eru á forræði utanríkisráðuneytisins.

Í ákvörðuninni er hafnað rökum Mílu (sem á og rekur fjarskiptanet Símans) um að kröfugerð Vodafone um aðgang hefði átt að beina til utanríkisráðuneytisins og um að Varnarmálastofnun, sem leigði Vodafone einn ljósleiðara í kapli NATO, hefði ekki heimild til fjarskiptastarfsemi.

PFS vísar til þess að samkvæmt ákvörðun stofnunarinnar frá árinu 2007 og með vísan til fjarskiptalaga hvíli sú kvöð á Mílu að veita aðgang að kaplinum. „Míla ehf. skal hafa forræði á því hvernig uppsetningu verður háttað og leggja til nauðsynlegar teikningar ef þurfa þykir. Fyrirtækið skal hafa hliðsjón af þeirri lýsingu sem fram kemur í erindi Og fjarskipta,“ segir jafnframt í ákvörðuninni. Um leið er áréttað að Míla megi rukka Vodafone um kostnað vegna breytinga sem ráðist verði í til að veita aðganginn.

„Við fögnum að sjálfsögðu niðurstöðunni, enda er óheftur aðgangur að ljósleiðaranum, sem við greiðum fyrir samkvæmt samningi við hið opinbera, forsenda þess að samkeppni skapist í gagnaflutningum um landið,“ segir Hrannar Pétursson, upplýsingafulltrúi Vodafone. „Fyrirtæki hafa þurft að kaupa gagnasambönd Mílu, sem hefur verðlagt þjónustuna í samræmi við stöðu sína á markaðnum,“ segir hann og boðar aukna þjónustu þar sem samkeppni hafi verið takmörkuð þar til nú.

PFS hafnaði kröfu um að Míla yrði beitt dagsektum vegna dráttar tengingar Vodafone við kapalinn. „Eins og málavöxtum er háttað verður að telja að sá dráttur sem orðið hefur á málinu sé ekki eingöngu af völdum Mílu, heldur sé hann að hluta til á ábyrgð Varnarmálastofnunar sem gagnaðila fyrirtækisins, meðal annars með því að draga að tilkynna um fjarskiptastarfsemi sína og ganga frá óleystum atriðum varðandi eignarhaldið á strengnum,“ segir í ákvörðuninni.

Ekki náðist í Evu Magnúsdóttur, forstöðumann sölu hjá Mílu. Fyrirtækið getur innan fjögurra vikna skotið ákvörðun PFS til úrskurðarnefndar fjarskipta- og póstmála.

olikr@frettabladid.is