Rektorinn á Hvanneyri: Þetta verður ekki liðið

Nemendur og starfsfólk við Landbúnaðarháskólann á Hvanneyri er miður sín eftir að nemandi við skólann tók fjóra samnemendur sína í gíslingu í nótt og hótaði þeim með hnífi.

Ágúst Sigurðsson, rektor Landbúnaðarháskólans á Hvanneyri, segir málið nú alfarið í höndum lögreglunnar. „Við lítum þetta mjög alvarlegum augum. Þetta verður ekki liðið," segir Ágúst.

Samkvæmt heimildum fréttastofu kom atvikið upp í kjölfar gleðskapar sem virðist hafa farið úr böndunum.

Ágúst bendir á að á Hvanneyri sé lítið og friðsælt samfélag sem muni taka á þessu atviki saman. Ágúst býst fastlega við því að umræddur nemandi verði rekinn úr skólanum. Þeir nemendur sem urðu vitni að atvikinu hafa fengið áfallahjálp.

Maðurinn er nú í haldi lögreglu og verður yfirheyrður frekar í dag.