Maraþonhlauparar lagðir af stað

Yfir tíu þúsund hlauparar eru skráðir til þátttöku í Reykjavíkurmaraþoni, sem nú stendur yfir.

Fyrstu hlauparar voru ræstir klukkan tuttugu mínútum fyrir níu en þeir hlaupa heilt maraþon, 42 kílómetra, hálft maraþon, 21 kílómetra, og maraþon boðhlaup.

Fjölmennasti hópurinn, sem hleypur 10 kílómetra, var ræstur klukkan hálftíu, en það eru um 3.700 hlauparar.

Síðasti hlutinn, Latabæjarhlaupið hefst svo í Hljómskálagarðinum frá klukkan hálfeitt.

Hægt er að fylgjast með gengi hlaupara nánast beint á netinu Tímatökuflaga sem keppnishlauparar þurfa að festa í skóreimarnar eða við ökklann (boðhlaup) gerir þetta kleift.

Hjá maraþonhlaupurunum og boðhlaupsliðunum mun sjást millitími eftir 10 km, 20 km, 21,1 km, 30 km og 40 km. Að lokum birtist síðan tími þeirra þegar þeir koma í mark.