Vantraustyfirlýsing á lögfræðing Seðlabanka Íslands

Seðlabankastjóri gerir lítið úr aðallögfræðingi bankans, sem var sammála niðurstöðu lögfræðiálits um sennilegt ólögmæti gengislánanna, en bankinn þagði þunnu hljóði um niðurstöðuna. Þetta segir stjórnarmaður í hagsmunasamtökum heimilanna sem telur framferðið í raun vantraustsyfirlýsingu á lögfræðinginn.

Lögfræðiálit sem Seðlabanki Íslands fékk frá lögmannstofunni LEX 12. maí á síðasta ári benti til að sennilega voru gengistryggð lán ólögleg. 13 mánuðum síðar dæmdi Hæstiréttur að lánin væru ólögleg.

Már Guðmundsson seðlabankastjóri sagði við fréttastofu í gær að hvorki bönkum né skilanefndum hafi verið kynntar niðurstöður álitsins. Álitið barst seðlabankanum um svipað leyti og samningaviðræður um uppgjör eigna gömlu bankanna stóðu sem hæst.

Marinó G. Njálsson, stjórnarmaður í Hagsmunasamtökum heimilanna, segir lögfræðiálitið hefði átt að vera birt almenningi. Hver sem niðurstaðan væri. Hann segir að aðalögfræðingur Seðlabankans hafi verið sammála álitinu, hann sé æðsti lögfræðingur fjármálakerfisins, og hans orð vigti þungt.

„Mér finnst pínulítið eins og að Már sé að gera lítið úr lögfræðingnum og í raun er þetta vantraust yfirlýsing á aðallögfræðingi Seðlabanka Íslands," segir Marinó.

Marinó segir seðlabankastjóri hafi sagt að hans álit sé til jafns við annarra lögfræðinga. En hvaða áhrif hefði það haft ef lögfræðiálitið hefði verið birt opinberlega?

„Það hefði verið hægt að undirbúa þjóðfélagið fyrir það högg sem hugsanlegur dómur myndi verða," segir Marinó.

Eygló Harðardóttir, þingmaður Framsóknarflokksins, sagði við fréttasofu að Gylfi Magnússon viðskiptaráðherra hafi ekki komið hreint fram þegar þingmenn spurðu hann hvort ráðuneytið hafi gert lögfræðiálit um lögmæti gengistryggðra lána. Hann hafi ætíð sagt nei en Már hefur upplýst að umrætt löfræðiálit hafi verið sent viðskiptaráðuneytinu.

Gylfi Magnússon viðskiptráðherra sagði í sms-skeyti til fréttastofu að málið verði skoðað í ráðuneytinu eftir helgi. Annað vildi hann ekki segja.