Íbúum fækkaði um 1240

Íbúum á landinu hefur fækkað um 1.240 á einu ári eða um 0,4%, samkvæmt nýjum tölum frá Hagstofunni. Þann 1. júlí síðastliðinn voru landsmenn 318.006 en voru 319.246 fyrir ári síðan.

Milli 1. júlí í fyrra og 1. júlí í ár fækkaði íbúum í öllum landshlutum, að frátöldu Norðurlandi eystra en þar fjölgaði um 103 eða 0,4%. Mesta fækkunin varð á Suðurnesjum, eða um 1,6%, og á Suðurlandi ásamt Vestfjörðum þar sem fækkunin var 1,5%.

Á höfuðborgarsvæðinu búa nú 63,3% þjóðarinnar og fækkaði íbúum þar milli ára um 248 eða 0,1%. Mestu munar um fækkun í Reykjavík, en þar fækkaði um 533 og Hafnarfirði, en þar fækkaði um 172. Í Kópavogi fjölgaði um 151 íbúa milli ára.