Þyrlan í þrjú útköll í röð

Þyrluáhöfn Landhelgisgæslunnar hefur haft í nægu að snúast frá því í gærkvöldi en þyrlan hefur farið þrisvar sinnum í útkall frá því klukkan sjö í gærkvöldi. Fyrsta verkefnið var að sækja sjómann um borð í norskan togara en sá var með bólgur í munnholi. Togarinn var staddur um 175 sjómílur norðvestur af Reykjavík og lenti TF-Líf með manninn á Reykjavíkurflugvelli um klukkan hálfellefu.

Áður en þyrlan lenti í Reykjavík höfðu þegar borist tvær aðrar beiðnir um sjúkraflug. Fyrst var óskað eftir aðstoð vegna sjómanns sem hafði slasast um borð í fiskibát í Grímsey og síðan vegna manns sem fengið hafði heilablóðfall í Öræfum. Eftir að læknir Gæslunnar hafði lagt mat sitt á hvort væri meira aðkallandi var ákveðið að sækja manninn sem fengið hafði heilablóðfallið fyrst.

Flogið var til móts við sjúkrabíl hafði sótt manninn og var hann fluttur um borð í þyrluna í nágrenni við Kirkjubæjarklaustur. Eftir að sjúklingnum hafði verið komið á spítala í Reykjavík var að nýju haldið í loftið og að þessu sinni til Grímseyjar til þess að sækja sjómanninn slasaða því þoka hamlaði því að hægt væri að flytja manninn með sjúkraflugi. Búist var við því að þyrlan kæmi til Reykjavíkur um klukkan sjö.