Brotist inn í líkamsræktarstöð í Reykjavík

Tilkynnt var um innbrot í líkamsræktarstöð í austurhluta Reykjavíkur um klukkan fjögur í nótt. Að sögn lögreglu virðist engu hafa verið stolið í innbrotinu en þjófarnir voru búnir að taka nokkra verðmæta hluti til þegar styggð virðist hafa komið að þeim og þeir látið sig hverfa út í myrkrið. Að öðru leyti var nóttin róleg hjá lögreglunni á höfuðborgarsvæðinu.

Slökkviliðið sendi dælubíl og sjúkrabíla á Sæbrautina um klukkan hálfþrjú í nótt en þar hafði bifreið verið ekið á staur og voru fjórir í bílnum. Fólkið reyndist ekki alvarlega slasað en var þó flutt á slysadeild til öryggis.