Óttast greiðsluþrot Reykjanesbæjar

Kristinn Jakobsson, oddviti Framsóknarmanna í Reykjanesbæ, segist óttast að bærinn gæti verið settur undir eftirlitsnefnd með fjármálum sveitarfélaganna. Hann segir skuldir bæjarsjóðs nema um 400% prósent af árstekjum og þetta hlutfall fari hækkandi. Bærinn hafi bjargað sér fyrir horn vegna gengishagnaðar en reksturinn sé of dýr.

„Samkvæmt 6 mánaða rekstraruppgjöri var tap upp á 566 milljónir króna," segir Kristinn. „Það lítur því út fyrir að það sé alvarleg staða á bæjarsjóði."

Í bókun sem Kristinn lagði fram á dögunum bendir hann á að ekki hafi tekist að ná endum saman í rekstri bæjarfélagsins. Hann segir að samkvæmt tillögu um breytingar á sveitastjórnarlögum eigi hlutfall skulda A og B hluta bæjarfélaga ekki að vera hærri en 150% af árstekjum sveitarfélaga.

„Skuldir Álftaness voru yfir 400% af árstekjum þegar þeir fóru undir eftirlitsnefndina. Okkar var 399% á sama tíma og ég óttast að þessi tala muni hækka," segir Kristinn. Hann segir markmiðið með bókunina hafa verið að vekja athygli á þessari alvarlegu stöðu bæjarsjóðs.

„Nú er að fara af stað endurskoðun fjárhagsáætlunar og því mikilvægt að bregðast rétt við," segir Kristinn.