Fleiri fóru til hjúkrunarfræðinga og ljósmæðra

Skráðum viðtölum hjá hjúkrunarfræðingum og ljósmæðrum á heilsugæslustöðvum fjölgaði töluvert milli áranna 2008 og 2009. Þetta kemur fram í Talnabrunni, fréttabréfi landlæknis um heilbrigðistölfræði.

Skráð viðtöl hjá læknum á heilsugæslustöðvum árið 2009 voru 668.744, eða 2,1 á hvern íbúa, sem er svipað og árið áður. Viðtölum hjúkrunarfræðinga og ljósmæðra fjölgaði hins vegar töluvert árið 2009 miðað við árið áður. Viðtölunum fjölgaði úr 0,7 á hvern íbúa á árinu 2008 í 0,9 á íbúa á árinu 2009.

„Samkvæmt upplýsingum frá Heilsugæslu höfuðborgarsvæðisins skýrir bólusetning gegn svínaflensu að miklu leyti þessa aukningu. Byrjað var að bólusetja gegn inflúensunni í október 2009 og var því verki að miklu leyti sinnt af hjúkrunarfræðingum og ljósmæðrum," segir í Talnabrunni sem hægt er að skoða hér.