Fær ekki að tryggja barn með athyglisbrest

Sunna Albertsdóttir fékk ekki að tryggja sjö ára gamlan son sinn sem er greindur með ofvirkni og athyglisbrest. Hún gagnrýnir Sjóvá og segir tryggingarskilmálana afar undarlega - til dæmis sé ekki hægt að tryggja börn sem greind eru með lesblindu.

„Við sóttum um barnatryggingu hjá Sjóvá og fengum þetta svar í dag," segir Sunna en í svarinu frá Sjóvá segir að ekki sé hægt að tryggja barnið þar sem það þjáist af ofvirkni og athyglisbrest en hún geti hins vegar sótt aftur um tryggingu fyrir barnið að ári.

„Ég veit ekki hvað ætti að hafa breyst eftir ár, jú barnið verður kannski orðið tíu sentímetrum hærra en þessi sjúkdómur hverfur ekki."

Sunna segist ekki skilja rökin á bak við ákvörðun Sjóvá. Hún bendir á að sífellt stækkandi hópur krakka sé í dag greindur með athyglisbrest eða ofvirkni og það sé verið að útiloka það að sá hópur fái notið trygginga. Sjálf er Sunna með ADHD líkt og dóttir hennar. „Hún er samt með mjög góðar einkunnir í íþróttum og öðrum greinum í skólanum," segir Sunna.

Eftir að hafa fengið svar Sjóvá í hendurnar segist Sunna efins um að hún vilji halda áfram viðskiptum við tryggingafélagið. „Ég er að íhuga að færa mínar tryggingar í burtu frá Sjóvá. Ég ætla líka að tala við þá hjá Sjónarhóli sem eru regnhlífasamtök fyrir fólk með athyglisbrest og ofvirkni."

Sunna segir málið alvarlegt. „Það er allt í lagi að benda fólki á þetta. Það er mikið af krökkum í þjóðfélaginu sem þjáist af þessum röskunum og hvað gerist í framtíðinni þegar þau verða eldri. Á sonur minn ekki að eiga rétt á líf og sjúkdómatryggingu?"