Dæmd í 2ja ára fangelsi fyrir fjárdrátt frá sendiráðinu í Vín

Tuttugu og níu ára gömul kona var í morgun dæmd í 2ja ára fangelsi fyrir að draga sér fé frá íslenska sendiráðinu í Vínarborg. 22 mánuðir dómsins eru skilorðsbundnir. Konan starfaði sem bókari hjá sendiráðinu og játaði að hafa dregið sér og notað heimildarlaust í eigin þágu 335 þúsund evrur, eða um 51 milljón íslenskra króna.

Málið komst upp í október á síðasta ári en fjárdrátturinn átti sér stað á sjö mánaða tímabili. Konan lét af störfum um leið og málið uppgötvaðist. Málið var kært til lögreglu.

Þá var jafnframt ákveðið að Ríkisendurskoðun myndi fara yfir verkferla ráðuneytisins sem tengdust þessu atviki.

Konan var ekki viðstödd uppkvaðningu dómsins í Héraðsdómi Reykjavíkur í morgun.