Bassaleikari HAM aðstoðar Jón Gnarr tímabundið

S. Björn Blöndal varaborgarfulltrúi er aðstoðarmaður Jóns Gnarr borgarstjóra nú tímabundið á meðan Heiða Kristín Helgadóttir er í sumarfríi. S. Björn er framkvæmdastjóri Besta flokksins auk þess að vera varaborgarfulltrúi. Hann skipaði níunda sætið á lista Besta flokksins í vor og mun gegna starfinu til mánaðarmóta þegar að Heiða tekur aftur við starfinu.

„Ég er bara að leysa Heiðu af, hún hefur ekkert fengið frí og átti það bara skilið," segir S. Björn í samtali við Vísi. Hann segir starfið vera mjög fínt. „Þetta er voða gaman." Hann segist hafa verið Jóni Gnarr til aðstoðar frá stofnun Besta flokksins og hefur einnig verið í mjög náinni samvinnu við Heiðu Kristínu.

Ásamt ofangreindum störfum er hann einnig bassaleikari hljómsveitarinnar HAM. Annar meðlimur þeirrar hljómsveitar er einnig í  Besta flokknum. Það er Óttar Proppé.

Að hans sögn er þetta í fyrsta sinn sem hann gegnir opinberu starfi. „Ég vissi ekki að svona aðstoðarmenn væru til þangað til bara núna, mér fannst það mjög merkilegt."