Forstjóri OR og faðir stjórnarformanns fengu umdeildar verktakagreiðslur

Faðir Haralds Flosa Tryggvasonar, stjórnarformanns Orkuveitu Reykjavíkur (OR), og nýráðinn forstjóri Orkuveitunnar, Dr. Helgi Þór Ingason, sátu saman í stjórn eignarhaldsfélagsins Nordica ráðgjöf.

Haraldur Flosi var spurður um þessi tengsl í Kastljósi í kvöld en þá sagði hann að faðir sinn og Helgi hefðu rekið námskeið saman fyrir um fimmtán árum síðan.

Félagið komst í fréttirnar í febrúar á þessu ári þegar Ríkisendurskoðun gagnrýndi Háskóla Íslands (HÍ) harðlega fyrir óvanalega háar verktakagreiðslur til nokkurra eignarhaldsfélaga sem starfsmenn skólans sátu í.

Félagið sem hlaut hæstu greiðsluna, eða 16 milljónir, var fyrrnefnt eignarhaldsfélag - Nordica ráðgjöf. Verktakagreiðslurnar voru fyrir störf hjá Endurmenntunnarstofnun HÍ.

Í stjórn félagsins sátu Helgi Þór, sem er nýráðinn forstjóri Orkuveitunnar, ásamt þeim Hauki Inga Jónssyni dósent og Tryggva Sigurbjarnasyni, sem er faðir Haralds Flosa.

Ríkisendurskoðun spurði Háskóla Íslands afhverju fyrrgreindir starfsmenn HÍ væru verktakar en ekki venjulegir launamenn í þessum verkefnum.

Í svari HÍ kom meðal annars fram að kennsla við Endurmenntunnarstofnunin væri ekki hluti af starfsskyldum fastra kennara við kennslu, rannsóknir og stjórnun. Námið færi almennt fram utan hefðbundins vinnutíma, það er, á kvöldin og um helgar og sinni kennararnir því í aukavinnu.

Haraldur Flosi var hinsvegar spurður í kvöld í Kastljósi um tengsl hans við Helga Þór. Þá svaraði hann því að faðir hans og Helgi Þór hefðu rekið námskeið saman fyrir um fimmtán árum síðan.

Haraldur áréttaði að Helgi Þór hefði þá reynslu og þekkingu sem stjórn Orkuveitunnar teldi æskilega fyrir starfið. Að auki taldi stjórnin að Helgi væri óumdeildur.