Elvar bestur í þuklinu | Myndir

Íslandsmeistaramótið í hrútadómum var nýverið haldið í áttunda sinn á Ströndum og var það Bolvíkingurinn Elvar Stefánsson sem fór með sigur af hólmi í flokki vanra þuklara. Hann hefur keppt í þuklinu svo til frá upphafi og náði meðal annars öðru sæti árið 2005. Þrátt fyrir mikla rigningu hafa áhorfendur og keppendur aldrei áður verið fleiri, að því er fram kemur í tilkynningu.

Elvar hlaut því til varðveislu í eitt ár verðlaunagripinn Horft til himins sem er tileinkaður minningu Brynjólfs Sæmundssonar ráðunautar á Hólmavík, auk fjölda annarra verðlauna. Aðrir verðlaunahafar í flokknum hafa komið áður við sögu hrútadómanna. Í flokki óvanra fór Brynja Bjarnfjörð Magnúsdóttir með sigur af hólmi með aðstoð hinnar þriggja ára gömlu Emmu Ýr Kristjönudóttur.

Hrútasæði meðal verðlauna



Hrútarnir sem voru dæmdir voru þeir Spaði, Grafar, Hvellur og Fleygur, en allir eru þeir í eigu Jóns Stefánssonar á Broddanesi utan þess síðastnefnda sem er í eigu Matthíasar Lýðssonar í Húsavík. Það voru 24 sem kepptu í óvana flokknum en 22 tóku þátt í flokki hinna vönu.

Verðlaun voru afar vegleg, að því er fram kemur í tilkynningunni, meðal annars fengu sigurvegararnir í vana flokknum 5, 10 og 15 skammta af hrútasæði frá Sauðfjársæðingarstöð Vesturlands. Margir aðrir vinningar voru einnig veittir keppendum í þremur efstu sætum í hvorum flokki frá Bændasamtökum Íslands, Sauðfjársetrinu, Strandagaldri, Malarhorni á Drangsnesi, Hólmadrangi, Strandalambi í Húsavík og Strandakúnst á Hólmavík.

- Sigurvegarar í flokki vanra hrútaþuklara:

1) Elvar Stefánsson, Bolungarvík

2) Björn Torfason, Melum í Árneshreppi

3) Eiríkur Helgason, Stykkishólmi

- Sigurvegarar í flokki óvanra hrútaþuklara:

1) Emma Ýr Kristjönudóttir, Hólmavík (3ja ára) og Brynja Bjarnfjörð Magnúsdóttir, Keflavík

2) Guðný Hrund Þorsteinsdóttir, Reykjavík (11 ára)

3) Birna Ingimarsdóttir, Kaldrananesi í Bjarnarfirði