Eduardo gerir nýjan langtímasamning við Arsenal

Eduardo hefur skrifað undir nýjan langtímasamning við enska úrvalsdeildarfélagið Arsenal.

„Eduardo er sérstakur leikmaður sem býr yfir miklum hæfileikum," sagði Arsene Wenger, stjóri Arsenal, á heimasíðu félagsins. „Við erum afar ánægðir með að hann verði áfram hjá okkur."

Eduardo gekk í raðir Arsenal í júlí árið 2007 og hefur skorað alls átján mörk í 48 leikjum. Frægt er þegar hann fótbrotnaði illa í leik gegn Birmingham en hann lék ekkert í næstum heilt ár vegna meiðslanna.

„Ég er mjög ánægður og vonandi verð ég hjá Arsenal eins lengi og ég mögulega get," sagði Eduardo sjálfur. „Mér líður vel og gæti spilað heilan knattspyrnuleik á þriggja daga fresti ef þess væri þörf."

Eins og hefur tíðkast þegar Arsenal gerir nýja langtímasamninga við leikmenn sína er ekki tilgreint hversu langur samningstíminn er.