Portsmouth ekki á eftir Zaki

Peter Storrie, framkvæmdarstjóri Portsmouth, segir að félagið sé ekki á höttunum eftir Egyptanum Amr Zaki.

Zaki var í láni hjá Wigan á síðasta tímabili og hefur verið þrálátlega orðaður við Portsmouth. Hann var sagður nálægt því að fara til liðsins áður en félagaskiptaglugginn lokaði nú í sumar.

Fyrrum eigandi félagsins, Sulaiman Al Fahim, var sagður áhugasamur um að fá Zaki til félagsins á sínum tíma. Al Fahim er stjórnarformaður í dag og hefur Zaki sjálfur fullyrt að hann hafi rætt við Al Fahim um að koma til Portsmouth í janúar næstkomandi.

„Það er nýtt fyrir okkur. Við höfðum ekkert heyrt um það," sagði Storrie í samtali við enska fjölmiðla. „Þetta hefur ekkert með okkur að gera og svo virðist sem að annað fólk hafi blandað sér í þetta mál."

„Líklegast er að umboðsmaður leikmannsins hafi verið að tjá sig um málið. Það er oftast þannig."