Fimmta hver götuð víðar en í eyrunum

Tæpur fimmtungur, eða 19,6 prósent, unglingsstúlkna í tíunda bekk grunnskóla er með hringi eða pinna annars staðar en í eyrunum. Þetta kemur fram í könnun Rannsókna og greiningar meðal grunnskólabarna. 6,5 prósent drengja á sama aldri bera ámóta skraut.

Þá kemur fram að 5,8 prósent drengja í tíunda bekk hafa látið setja á sig varanlegt húðflúr, en 4,7 prósent stúlknanna.

Hlutfallið lækkar heldur með yngri aldri, en í níunda bekk eru 13,6 prósent stúlkna með pinna og hringi annars staðar en í eyrunum og 6,3 prósent í áttunda bekk. Þá bera ekki margar stúlkur á þeim aldri varanleg húðflúr, 2,2 prósent í níunda bekk og 1,6 prósent í yngsta hópnum. Svipaða sögu er að segja af drengjunum.

Rannsóknin var lögð fyrir árið 2008 meðal um 85 prósenta nemenda á landinu öllu.

Þá virðist meirihluti unglinganna hafa fengið leyfi fyrir götun eða flúri hjá forráðamönnum, en færri hugsað út í smithættu eða fengið leiðbeiningar um hana. Þá mun vera misbrestur á að húðflúrstofur fari fram á að viðskiptavinir framvísi skilríkjum.

Af þeim krökkum í tíunda bekk sem fengið hafa sér varanlegt húðflúr hefur 81 prósent fengið leyfi foreldra fyrir fram, en tæpur fimmtungur ekki.

Hlutfall þeirra sem ekki hafa fengið leyfi er svo aftur hærra eftir því sem börnin eru yngri sem farið hafa þessa leið.

„Við höfum verið að reyna að láta draga eitthvað úr þessu,“ segir Matthías Halldórsson landlæknir. „Og af því þetta er ekki bannað, að passa líka upp á að þeir sem gera þetta hafi einhverja kunnáttu í sóttvörnum og slíku.“

Að sögn landlæknis þurfa þeir sem reka húðflúrstofur að hafa fengið upplýsingar og leiðbeiningar hjá embættinu áður en þeir fá starfsleyfi.

„Hér starfar hjúkrunar­fræðingur á sóttvarnasviði sem talar við fólkið og bendir þeim á helstu hættur.“

Fari húðflúrstofur ekki að fyrir­mælum um að gæta að aldri þeirra sem láta flúra sig eða gata, eða gæti þess ekki að börn hafi leyfi foreldra, segir Matthías stofurnar hætta á að missa starfsleyfi sitt. „Þær verða að gangast undir skilmála Heilbrigðiseftirlitsins, sem hefur verið í samráði við okkur.“ olikr@frettabladid.is