Forman er hápunktur RIFF

Alþjóðleg kvikmyndahátíð í Reykjavík, RIFF, hefst 17. september og stendur yfir í ellefu daga. Heiðurs­gestur­inn Milos Forman verður viðstaddur viðhafnarsýningu á Gaukshreiðrinu.

Þrjár myndir Formans verða sýndar á hátíðinni. Auk Gaukshreiðursins verða sýndar Amadeus og Horí, ma panenko. Þá síðastnefndu gerði Forman á meðan hann bjó enn í Tékkóslóvakíu og er frá 1967. Hann er einn fjögurra núlifandi leikstjóra sem hafa hlotið Óskarsverðlaunin tvisvar fyrir leikstjórn, fyrst fyrir Gaukshreiðrið og síðan fyrir Amadeus. Hinir leikstjórarnir eru Clint Eastwood, Oliver Stone og Steven Spielberg.

Hrönn Marinósdóttir, skipuleggjandi RIFF, segir það stórviðburð að fá þennan merka leikstjóra til landsins.

„Það má segja að þetta sé hápunktur hátíðarinnar frá því að hún var stofnuð árið 2004. Hann er einn fremsti kvikmyndaleikstjóri samtímans og það er mikill heiður að fá hann hingað.“

Viðhafnarsýningin á Gaukshreiðrinu verður í aðalsal Háskólabíós 23. september kl. 20 að viðstöddum Forman og mun hann svara spurningum áhorfenda í sal að lokinni sýningu. Hann mun einnig ræða um kvikmyndalist sína í hátíðarsal Háskóla Íslands 22. september kl. 14 og mun Baltasar Kormákur stýra þeim umræðum.

Auk Formans koma á sjötta tug erlendra leikstjóra á hátíðina og munu þeir allir taka þátt í dagskránni með einum eða öðrum hætti. Alls verða rúmlega hundrað myndir sýndar á hátíðinni og keppa þær í níu mismunandi flokkum. Á hátíðinni verða kynntar til sögunnar fjölskylduvænar nýjungar, svo sem foreldrabíó þar sem gert er ráð fyrir barnavögnum í salnum. Börnum verður einnig boðið í bíó 21. til 25. september kl. 14 til 16 í Norræna húsinu.

Fjórtán myndir keppa um Gyllta lundann, æðstu verðlaun hátíðarinnar. Sigurvegarinn hlýtur útnefninguna uppgötvun ársins. Stefán Pétur Sólveigarson hefur hannað nýjan verðlaunagrip af þessu tilefni og var hann afhjúpaður í gær.

„Þetta var ótrúlega gaman en líka svolítið krefjandi því fólk hefur sterkar skoðanir á svona verðlaunagripum,“ segir hann um hönnun sína. Sala á miðum, afsláttarkortum og pössum á hátíðina hefst í Eymundsson í Austurstræti í dag.

freyr@frettabladid.is