Átta ára gömul stúlka slasaðist illa á kynfærum

Fólk sem stendur í byggingarframkvæmdum verður að ganga frá byggingarsvæðunum og byggingunum svo ekki hljótist af hroðaleg slys. Þetta sagði Herdís Storgaard hjá Forvarnarhúsi Sjóvá í samtali við Reykjavík síðdegis í dag.

Herdís sagði frá sorglegu slysi sem varð fyrir skömmu þegar átta gömul stelpa slasaðist alvarlega. Stelpan var úti að leika sér ásamt vinkonu sinni þegar þær komu að vinnusvæði. Á svæðinu var búið að grafa niður sökkla þar sem átti að festa niður stoðir fyrir grindverk. Svæðið var opið og stúlkan gat því farið þangað að eigin vild. Stúlkan steig á einhverskonar op fyrir ofan sökkulinn og féll niður að sögn Herdísar. „Kantarnir á þessum sökkli eru eins og hnífar og hún slasaðist mjög alvarlega á kynfærum og bara mjög alvarlega á milli fótanna og þurfti að fara í aðgerð," segir Herdís. Hún segir að það liggi fyrir önnur aðgerð sem stúlkan bíði eftir að fara í. Mikilvægt sé að ganga frá vinnusvæðum svo atvik eins og þetta endurtaki sig ekki.

Herdís segir að eigendur slíkra vinnusvæða verði að gera sér grein fyrir því að þeir bera fyrst og fremst ábyrgð á þessu. Hins vegar verði allir að vera vakandi fyrir hættum af þessu tagi. Íbúar í nágrenni við slík svæði geti til dæmis gert viðvart ef þeir verði vitni af því að ekki sé nægilega vel gengið frá þeim.