Mascherano styður Benitez

Það er heldur betur farið að hitna undir Rafa Benitez, stjóra Liverpool, eftir fjórða tap Liverpool í röð. Hann er þó ekki án stuðningsmanna og þar á meðal er Javier Mascherano sem segir hann hafa sinn stuðning sem og annarra leikmanna liðsins.

„Það eru leikmennirnir sem spila á vellinum og þar getur stjórinn ekki talað við okkur og sagt hvernig við eigum að spila," sagði Mascherano.

„Við berum ábyrgð og það erum við sem þurfum að vinna vinnuna á vellinum. Ég tel að leikaðferð Benitez sé að virka. Það er ekki vandamálið. Vandamálið er að við erum ekki að spila eins vel og við getum. Við trúum samt enn á hvorn annan sem og þjálfarana."