Herramenn á leið heim til Íslands

„Ég er rosalega spenntur,“ segir heimildarmyndagerðarmaðurinn Janus Bragi Jakobsson. Hann er á leiðinni til Íslands í tilefni af sýningu útskriftarmyndar sinnar The Gentlemen á kvikmyndahátíðinni RIFF. Myndin, sem verður frumsýnd á föstudaginn, er lokaverkefni hans úr Danska kvikmyndaskólanum. Hún var áður sýnd á Skjaldborgarhátíðinni við góðar undirtektir en Janus var ekki viðstaddur þá sýningu.

Með aðalhlutverkin fara útvarpsmaðurinn Andri Freyr Viðarsson, Haukur Þórðarson og Sindri Már Finnbogason. Fjallar hún þrjá unga menn sem rifja upp gömul afrek, grípa í gítarana sína og leggja drög að nýrri hljómsveit. Óvíst er hvort aðalleikararnir komist allir á sýningu myndarinnar en þeir eru búsettir í Danmörku eins og Janus Bragi. „Maður er að reyna að draga drengina með sér en við sjáum til. Það væri gott að hafa mennina sér við hlið svo þeir gætu svarað fyrir sig.“

The Gentlemen var nýverið sýnd fyrir Íslendinga sem eru búsettir í Danmörku og fékk þar góð viðbrögð. „Það hefur sjaldan verið hlegið svona mikið. Það var mjög góð stemning,“ segir Janus, sem ætlar að halda partí á skemmtistaðnum Jakobsen eftir sýningu myndarinnar hér á landi.

Janus flytur heim til Íslands í október og hefur upptökur á heimildarmynd um Vestfirði, eins og Fréttablaðið hefur greint frá. Janus og kærastan hans fá gistingu í kjallaranum hjá Mugison á Súðavík á meðan á gerð myndarinnar stendur en tónlistarmaðurinn snjalli kemur einmitt að framleiðslunni.